PRESS RELEASE
Drachma (Drachma LGBTI u Drachma Parents
Group) dwar il-Position Paper tal-Knisja dwar il-Conversion Therapy
Hu dmir tagħna bħala
persuni LGBTIQ kif ukoll ġenituri ta’ persuni LGBTIQ li nħossuna nappartjenu
għall-fidi nisranija li ngħidu x’naħsbu dwar il-Position Paper tal-Knisja dwar
il-Conversion Therapy u ngħidu xi
stennejna li jkun fiha u x’ma stennejna qatt li jkun fiha.
1. Stennejna li l-grupp ta’ esperti li kiteb din il-Paper ikun jinkludi wkoll
persuni LGBTIQ li qed jgħixu din ir-realtà. Kien jixraq li l-Knisja tiddjaloga
magħna fuq dan is-suġġett delikat, speċjalment wara l-ġest sinifikanti li
l-Knisja wriet fl-aħħar xhur meta talbet rappreżentant minn Drachma biex tkun
parti mill-panel li kitbet
il-Position Paper fuq l-Embryo Act u
biex tkellem lill-Kulleġġ tal-Kappillani.
2. Stennejna li l-Knisja f’Malta ma terġax titlef okkażjoni li tibni pont
mal-komunità LGBTIQ. Stennejna li l-Knisja toħroġ tgħid ċar u tond li hi kontra
l-Conversion Therapy, anki jekk hemm
xi dispożizzjonijiet fl-abbozz li jistgħu jiġu ċċarati.
3. Stennejna li l-Knisja tgħid li tissimpatizza mal-persuni omosesswali li ġew
sottoposti għal conversion therapies
u titlob maħfra talli xi membri tagħha, inklużi saċerdoti, taw pariri biex dak
li jkun ifittex, jew huma stess għamlu, Conversion
therapy. Fl-ebda ħin il-Knisja ma tinħass inkwetata għal dak li għaddew
minnu persuni bħal dawn u l-familjari tagħhom.
4. Stennejna li l-preokkupazzjoni ewlenija tal-Position Paper kellha tkun
il-ħsara psikoloġika, emozzjonali u spiritwali kbira li ssir lill-vittmi tal-conversion therapies. Imma minflok,
l-akbar preokkupazzjoni tal-Paper hija li l-professjonisti ma jitilfux
l-indipendenza u ma jgħaddux mill-proċess kriminali. Dak li l-Paper qalet
fil-konklużjoni (jiġifieri li sfortunatament l-abbozz jindirizza l-bżonnijiet
ta’ grupp vulnerabbli a skapitu li jesponi professjonisti għal azzjoni
kriminali) jista’ jingħad bil-maqlub għal din il-Paper, jiġifieri li
sfortunatament il-Position Paper tipprova tiddefendi l-interessi
tal-professjonisti a skapitu ta’ grupp vulnerabbli ta’ persuni.
5. Nagħmluha ċara li aħna m’aħniex favur xi telf ta’ indipendenza
tal-professjonisti f’dan il-qasam jew li nikkriminalizzaw lil min hu ġenwin.
Tabilħaqq lil dawn li jaħdmu
b’mod ġenwin u b’etika professjonali nirringrazzjawhom tal-għajnuna u
s-servizz li jagħtu lil persuni LGBTIQ u l-familjari tagħhom.
6. Stennejna li l-Paper
tgħid ċar u tond li EBDA orjentazzjoni sesswali mhi marda jew diżordni, u
għalhekk wieħed m’għandux ifittex jew joffri fejqan.
7. Ma stennejniex li l-Paper tgħid li din il-liġi tista’ tolqot ħażin lil min,
minn jeddu, jrid ifittex terapija biex ibiddel l-orjentazzjoni sesswali jew
il-ġeneru tiegħu. Imma stennejna li l-Knisja teduka lill-pubbliku li
l-orjentazzjoni sesswali (hi liema hi) m’għandix tinbidel.
8. Ma stennejniex li l-Paper tgħid ukoll li wieħed għandu dritt jibdel
l-identità tal-ġeneru tiegħu. Fil-verità meta persuna trans tagħmel gender
reassignment ma tkunx qed tibdel il-ġeneru tagħha imma tagħmel is-sess
bijoloġiku li tkun ġiet imwielda bih jaqbel b’mod koerenti mal-identità
tal-ġeneru interjuri li għandha. Din MHIJIEX conversion therapy. Il-counselling li jista’ jsir qabel ma ssir
transizzjoni (li fil-fatt il-liġi ma tesiġiex bħala obbligu) mhuwiex biex jibdlek minn mara għal raġel jew bil-kontra
imma biex qabel ma wieħed jagħmel il-pass serju tat-transizzjoni wieħed ikun
jaf eżatt x’tinvolvi, jekk jafx biżżejjed lilu nnifsu, jekk jafx
il-konsegwenzi, x’inhuma l-istadji, biex jingħata kunsens infurmat, eċċ. Din
mhijiex il-conversion therapy li qed
nitkellmu dwarha. Il-membri tal-bord ta’ esperti li kiteb il-Paper messhom jafu
aħjar. L-abbozz qed jitkellem dwar persuni gay jew trans li jmorru għand
professjonista li jipprova ‘jfejjaq’ lil dak li jkun mill-omosesswalità jew
mit-transesswalità tiegħu. Din hi t-tip ta’ terapija li qed nitkellmu dwarha u
li m’għandhiex tibqa’ ssir. Ftit naraw skop, għalhekk, għal dawk
il-kwotazzjonijiet mill-Qorti Ewropea li ssemmew fil-Paper.
9. Ma stennejniex li l-Paper tgħid (paragrafu 7b) li persuna tkun trid jibdel
l-orjentazzjoni sesswali għal raġunijiet reliġjużi. Persuna tista’, għal
raġunijiet reliġjużi, tibdel l-imġiba sesswali tiegħu/tagħha, kemm
jekk tkun gay kif ukoll jekk hu/hi straight. Sfortunatament, persuna tista’
wkoll tipprova tirreprimi s-sesswalità tagħha. Madankollu ntennu, wieħed ma
jistax jibdel l-orjentazzjoni sesswali tiegħu/tagħha. Għaliex il-Knisja
se tkompli tipprova tagħti ‘tamiet foloz’ u skorretti, donnha trid tiddefendi
’il min jippromwovi dawn il-conversion
therapies? Ta’ min ngħidu wkoll li huwa proprju għal raġunijiet reliġjużi
li wieħed m’għandux jipprattika l-conversion
therapy, ġaladarba l-orjentazzjoni sesswali u l-identità tal-ġeneru
interjuri huma rigal mogħti minn Alla, u kwalunkwe terapija għandha jkollha biss
l-għan li tgħin lill-persuna jħaddan b’serenità dak li l-Mulej ikun tah.
10. Il-conversion therapy ma
tinkludix direzzjoni spiritwali lil persuni (gay jew straight) li jridu jgħixu
ħajja ċelibi. L-iskop tal-conversion
therapy mhux li tibdillek l-imġiba imma li tipprova tibdillek l-orjentazzjoni
sesswali tiegħek.
11. Ma stennejniex li l-Paper issemmi l-pedofilija bħala eżempju fost il-‘grey
areas’. Huwa sorprendenti kif bord ta’ esperti (li jinkludi wkoll psikologu) ma
jafx li m’hemm l-ebda konnessjoni bejn pedofilija u omosesswalità u li fil-fatt
huma żewġ affarijiet li m’għandhomx x’jaqsmu bejniethom.
12. Ma stennejniex li l-Position Paper tagħmel konnessjoni bejn l-omosesswalità
u t-trawmi tat-tfulija, minħabba li dan jimplika li l-omosesswalità hija frott
ta’ żvilupp ħażin jew irregolari. Li kieku raġel straight bata minn dawn l-istess trawmi, konna nfittxu li nfejquh
mill-eterosesswalità b’konessjoni mat-trawma?
13. L-eżempju li ssemma’, ukoll fil-‘grey areas’, ta’ persuna bisesswali li
tkun miżżewġa juri nuqqas ta’ għarfien ta’ din ir-realtà u jikkonferma kemm
kien ikun aħjar kieku fost il-membri tal-bord tal-esperti kien hemm persuni
LGBTIQ.
14. Nifhmu wkoll li jista’ jkun hemm aspetti mill-Abbozz tal-Liġi li jistgħu u
għandhom jiġu kkjarifikati sabiex ma jkunx hemm diffikultajiet
għall-professjonisti fil-ħidma tagħhom. Għalhekk nħeġġu aktar djalogu f’dan
ir-rigward.
15. Hu b’dispjaċir naraw li b’din il-Position Paper il-Knisja ma bniet l-ebda
pont mal-persuni LGBTIQ u l-familjari tagħhom f’Malta. Anzi, il-Knisja pjuttost
kompliet tibni ħajt. Drachma diversi drabi kellha tiltaqa' ma' persuni mkissrin
u li għadhom iġorru l-ħsara li saritilhom b'riżultat ta' mentalità bħal din u
ta' dawn is-suppost terapiji. Għaldaqstant, b’umiltà, Drachma tibqa’ dejjem
miftuħa għal djalogu ma’ kulħadd u toffri din l-istedina tagħha anke
lill-Arċisqof u lill-Knisja f’Malta. Drachma dejjem lesta li tagħti l-kontribut
tagħha f'każ li tintalab li tagħmel dan.
Chris Vella Joseanne
Peregin
Koordinatur Koordinatriċi
Drachma LGBTI Drachma
Parents Group
Il-Ħadd, 21 ta’ Frar 2016
No comments:
Post a Comment